Chacha Main Aap Ki Turbat – Mir Hasan Mir 2017

Chacha Main Aap Ki Turbat

Hai chacha Abbas (x3).

Haaye. Aray jab dafn karnay aaye tan-e-paash paash ko.
Abid pukaaray dekh ke Ghazi ki laash ko.
Aray chacha main aap ki turbat bananay aaya hoon.
Sakina ab bhi hai pyasi batanay aaya hoon.

Chacha main aap ki turbat bananay aaya hoon (x2).
Sakina ab bhi hai pyasi batanay aaya hoon.
Chacha main aap ki… (x2).

1. Bataaon kaisay chacha kya guzar gayi hum par.
Har aik sheyhar mein maray gaye humein pathar.
Thi maayain phuppian mere saath aye Ali ke pisar.
Ye saray zulm ke kissay sunaanay aaya hoon.
Chacha main aap ki… (x2).

2. Haram ko chor ke kufay se aa raha hoon chacha.
Bata gaye hain tumhari wasiyyatain baba.
Wahin ho qabr chida tha jahan pe mashkiza.
Kiya tha Sheh se jo waada nibhanay aaya hoon.
Chacha main aap ki… (x2).

3. Hai teen roz se laashay pe dhoop ka saaya.
Ye haal dekh ke rota hai khoon dil mera.
Ghareeb hoon main kafan tum ko de nahi sakta.
Tumhari laash ke tukday uthaanay aaya hoon.
Chacha main aap ki… (x2).

4. Sakina raah mein naakay se gir gayi thi abhi.
Wahi hai taaza riwaayat kamar pe likhi hui.
Hai jaari khoon jo is waqt ediyon se meri.
Layee se khaa ke abhi taaziyanay aaya hoon.
Chacha main aap ki… (x2).

5. Tumharay saamnay aati hai sharm kehtay huay.
Ye baat karta bhala kaisay saamnay un ke.
Abhi hain duur yahan se bani asad waalay.
Phupi ki chhin gayi chadar batanay aaya hoon.
Chacha main aap ki… (x2).

6. Layeen bachi ke gohar ko aisay cheena tha.
Giri zamee pe Sakina main khoon rota tha.
Wo jis zameen pe kaanton se khoon tapka tha.
Wo khaak rakhnay tumharay sirhaanay aaya hoon.
Chacha main aap ki… (x2).

7. Bagair in ke tum utray thay zeen se kaisay.
Haram to lut gaye ye baazu kat gaye jab se.
Paday thay duur ye laashay se aap ke kab se.
Katay ye baazu badan se milaanay aaya hoon.
Chacha main aap ki… (x2).

8. Bana ke qabr Takallum wo bola ro ro kar.
Yahan pe aayainge ab zaayireen shaam-o-sehar.
Jalay khayaam ki rakh kar lahad pe khaak magar.
Main pehla farsh azaa ka bichaanay aaya hoon.
Chacha main aap ki… (x2)

 

Check out other write-ups for Mir Hasan Mir
http://www.abulhasanlakhani.com/tag/mir-hasan-mir/