Hatheli Par Rakhay Sar (Salaam) – Abu Turab Naqvi 2022

Hatheli Par Rakhay Sar

Hatheli par rakhay sar Shah ke ansaar bethay hain
Khuda ki raah mein marnay ko sab tayyar bethay hain

Mussallay par Ali Akbar hi hain bethay huay lekin
Shabaahat keh rahi hai Ahmed e Mukhtar bethay hain

Sipah e shaam se Hurr ne kaha kasrat pe mat phoolo
Meri jaanib bahattar Haider e Karrar bethay hain

Abhi se ashkiya par is kadar dehshat hai kyun taari
Abhi to lashkar e Sheh ke alam bardaar bethay hain

Yahan se jaayenge seedhay ye Zehra ke khazanay mein
Meri palkoan pe jitne gohar e shehwaar bethay hain

Hatheli par rakhay sar Shah ke ansaar bethay hain

Koi paikaar e Asghar dekh ke ye keh nahi sakta
Ke ye is imtehaan mein aaj pehli baar bethay hain

Kiya hai shaam ke haakim ka peecha shaam tak logo
Kahin par aik pal kya Abid e beemar bethay hain

Jo na waaqif hain yaksar dostoan taqleed se ab tak
wo sab tauzeeh ke badlay liye akhbaar bethay hain

Farishtay qabr mein Hasnain ki hairat se ye bolay
Aray ye kya yahan to Haider e Karrar bethay hain

Khuda ki raah mein marnay ko sab tayyar bethay hain

Hatheli par…

Check out more kalaam by Brother Abu Turab Naqvi at
https://youtube.com/@abutuanaqvi2793